Parti Dayak nuduh perintah Sarawak nadai nuju, ngembuan ulah paranoid

KUCHING, 17 Oktober 2017 -Parti Bansa Dayak Sarawak Baru (PBDSB) nuduh Kepala Menteri Datuk Patinggi Abang Johari Tun Openg enggau Kabinet Nengeri Sarawak ngembuan ulah paranoid.

Cobbold John, presiden Parti Dayak

Ba penerang berita iya kemari, Abang Johari madah perintah nengeri sedia ngakun Tanah Adat Bansa Asal(NCR) ti nyengkaum Pemakai Menua (PM) enggau Pulau Galau(PG), tang reti tanah nya enda tau enda nyemetak.

"Ba penerang iya, Abang Johari madah ka reti Pemakai Menua enggau Pulau Galau tu enda nyemetak. Nya alai iya nyerah ka tanggungpengawa ngagai Uggah numbuh ka komiti mansik pekara tu. Tu ngamatka jaku aku ti dulu Abang Jo semina ngelempai ka penusah NCR ba Uggah aja,", presiden PBDSB  Cobbold John nyebut ba siti penerang media.

"Ba senentang tu, aku ngumbai iya paranoid sereta nadai adap tuju, lalu suah bekedalih ka reti PM enggau PG. Tang, iya enda ingat, tiga iku sapit iya kala nyadi Menteri Tanah lalu bekuasa ngubah Kod Tanah Sarawak," ku Cobbold.

"Pemutus kes Tuai Rumah Nyutan tu pelaba aku tentu meri empas ngagai pansik komiti ti betuai ka Uggah. Alai pia, Kort Federal udah netap k pemutus, tanah ti udah diberi Provisional Lease ukai tanah NCR agi lalu deka nyadi tanah perintah "stateland", Cobbold nerang.

Berindik ari pemutus kes Tuai Rumah Nyutan, pekara tu deka napi lebih pemar ke dudi hari ila. Nya alai, pekara tu enda tau enda diberi jaku pemutus enggau lengkas.

Cobbold mega madah ka, entara resolusyen ti patut dikena ngakun Tanah Adat Bansa Asal (NCR), nengah chara meri PL ngagai pengempu tanah lalu ukai nengah sebarang kompeni tauka ijinsi dikuasa perintah. Tang ku iya, perintah BN enggai narit PL ari kompeni laban sida nangi bebayar ka ungkus ti mar.

Cobbold ke benung bejalai ka pengawa parti di Kapit madah, Kepala Menteri patut ngaga atur betemu ngenyit entara penyakal enggau Barisan Nasional. Tu beguna amat nyadi ka platform bejurai ka isu NCR tu enggau lebih silik.

Kemari, Ketuai Nembiak parti tu mega ngansak perintah nyelit ka baru Seksyen 5(2)(f) ba ubah Kod Tanah Sarawak.

Ba pekara bukai, iya bisi madah deka ngaga penerang berita bekaul enggau siku chalun PBDS Baru ti deka dikirai di Kanowit.