Politik Pemansang diengkebang Taib nyadi penanggul Tanah Adat emar diputarka

KUCHING, Desember 10, 2018 - Presiden Parti Bansa Dayak Baru (PBDS Baru)  Cobbold John madahka isu Tanah Adat Bansa Asal (NCR) napi pemar diputarka bepun ari agenda Politik Pemansang ke ditengkebang Taib Mahmud dulu menya.

Cobbold John

Iya mansut ka penemu tu nimbal sebengkah penerang ti dipansutka Kepala Menteri Abang Johari Tun Openg ba sebengkah pengerami apin lama tu tadi.

Ba berita ti dipansutka, Abang Johari bisi nyebut Taib "Apai Pemansang Menua Sarawak" sereta muji agenda politik pemansang ti ditengkebang Taib tu nyadi ka turai perintah nengeri ngemansangka menua tu.

Cobbold madah  penemu Politik Pemansang Taib tu enda engkeman laban ngenulu ka pemansang tang enda ngira adat asal   sereta daya idup sesebengkah bansa enggau pengerusak rampa menua.

Berindik ari nya, tuai-tuai Parti Bansa Dayak Sarawak (PBDS) ke dulu baka Datuk Seri Daniel Tajem, Tan Sri Leo Moggie, Harrison Ngau Laing enggau ke bukai nyengkaum Tan Sri Dr James Jemut Masing ba taun 80-an enggau 90-an datai ka parti tu ditingkil ka Opis Pengerejista Gerempung ba taun 2004 mantah polisi tu.

Diatu, ku Cobbold nambah, parti tu direjista baru lalu deka nampung agenda PBDS ngetan sereta bejaku ka ungkup Dayak ba menua Sarawak.

"Di Sarawak, parti politik ti pemadu bekuasa iya nya BN-PBB. Strategi PBB tu tadi nengah sistem birokrasi ke alai sida ngambi dua bengkah bagi jalai melitika tanah.

Kesatu, kitai Dayak ti diau di menua pesisir dipadahka sida seranta lalu beguna ka pemansang ari perintah dikena ngangkat ka tikas jalai pengidup.

 Kedua, sida mai bala Dayak nuju "pemansang" dikena napi ubah dunya globalisasi. Tang semua tu enda nyadi nyata laban BN-PBB Taib rambau tu ngemeranka ulah kroni politik", pia ko Cobbold nerang.

Sarawak tu menua ti benung ngangkat ka diri mansang lalu beguna ka system ekonomi ti entap ngerembai.

 Lalu ko Cobbold nandu,  tu meh kebuah Tanah Bansa Asal (Native Customary Land) dikalihka nyadi komoditi betanam ka sawit bedandang besai.

 Ari nya ku Cobbold, modus operandi perintah BN numbuhka Serikat Kunsi ke alai dagang begulai entara pengempu tanah enggau serikat-serikat. Ba ditu, 30% ungkup pengempu tanah, 60% enggi serikat lalu 10% dicukai Perintah Barisan.

"Nya meh kebuah, Kod Tanah Nengeri (SLC) diubah ba taun 2000 suba ke alai Seksyen 5 (2)(f) dipadamka. Tuju ubah tu semina dikena nyapai juluk ati Perintah BN Sarawak ngambi tanah tu nyadi tanah perintah ke dikumbai "state land",  ku Cobbold nerang.

"Berindik arinya, polisi politik pemansang tu meri dilemma ngagai Bansa Dayak. Pekara ti bepun ari sapa ti patut ngempu hak ekslusif ba tanah sekali ka rakyat tauka perintah?" tanya Cobbold.

"Nya alai, PBDS nekang nyebut Tanah Adat Bansal (NCR) patut disukat nengah Seksyen 18 Kod Tanah Nengeri ngambi ka pengempu tanah diberi hak ekslusif.

Tang perintah Barisan Nasional majak ka Seksyen 6 laban dikena bejalai ka politik pemansang ti ditengkebang Taib", ko Cobbold nyemetak nyebut.

Nampung penemu iya, Cobbold mega madah, serikat deka diberi Provisional Lease (PL) lalu nyadi pemegai lisin sepengelama 60 taun sereta pengempu tanah diberi "certificates of title" sepengudah tanah sida direjista ba bank.

Tang pekara tu suah nyadi ka penyarut laban mayuh kes ke alai serikat muka ladang komoditi sawit ngerampit tanah ti enda dibungkur dalam PL.

"Batang tanya mensia mayuh ngagai perintah nengeri, sekali ka bungkur kuasa "certificates of title" ulih ke jamin hak ekslusif pengempu tanah diberi ka rakyat?", pia ku tanya Cobbold.

"Kebuah aku betanya laban mayuh penyarut ti nyadi ari agenda politik pemansang Taib tu ke dipechara ka ba kort ke alai Serikat beambi ulih sereta nguna apek bayat ngenakut ka bala pengempu tanah," ku Cobbold.

"Kami pan suah ninga sebana rakyat ke alai ketuai komuniti bejual ka menua sereta nerima gaji ari serikat. Tu ngujung ka penyarut lalu perintah nengeri dipinta meri pemerat ba pekara tu", ku Cobbold.

Cobbold mega minta Abang Jo nyaut sereta mantai ka data statistik pemansang ka udah dijapai ari polisi politik pemansang tu. Kebuah pia, aku ngambi banding jaku Dr. James Masing ke madah ka jalai deka digaga nengah konsep Jiwa Murni.

"Kini ka tunga asil politik pemansang tu lalu nama kebuah mayuh jalai menua pesisir enda alah gaga nitih ka standard?" ku Cobbold nanya.

"Ba krisis tu kitai ulih meda ketuai Bansa Dayak ba Barisan Nasional tu baka enda peduli ka penusah ti ditapi rakyat."

"Bansa Dayak kedudi ari ila nyangka tau disema ka ngampar sebelah pasar ketegal ti nadai menua agi pendiau menua asal ti udah diambi dikena ngemansangka ladang sawit. Kitai Dayak diatu nyau baka temuai sereta bekuli ba tanah diriempu ketegal kena teruju politik pemansang tu," ku Cobbold.