SARIKEI, 9 Julai 2026: : Bisi 225 kaban baru nerima kad nyadi kaban Parti Sa’ati Rayat Sarawak (SUPP) lalu mandangka pengandal sida ngagai pengeransing parti nya sereta tuai Gempung Parti Sarawak (GPS) ngemudi pemansang nengeri.
Sapit Menteri Pengawa Bekebun Bedandang Besai enggau Komoditi ti mega Chairman SUPP Pampang Sarikei, Huang Tiong Sii madah, kaban ti nambah nya mandangka sukung rat rayat ngagai pengawa SUPP ti semampai keran negi hak rayat enggau pemansang Sarawak.
Iya ngelalu semua kaban baru ba ruang bilik besai SUPP lalu ngarap sida ulih begulai negap parti sereta terus gawa ke komuniti.
“SUPP semampai ngelalu penatai kaban baru. Pengelebih parti bepanggai ba kaban ti bekunsi juluk iya nya gawa ke rayat enggau ngemansang Sarawak.
“Aku mega gaga meda majak mayuh raban nembiak ngulu SUPP. Nengah semangat enggau kerejasama semua, kitai ulih nempa Sarawak ti maju, seati enggau lantang agi,” terang iya.
Iya nyebut jaku nya lebuh bejadi Pengawa Nyua Kad Nyadi Kaban SUPP di Palan Servis Pengari Rayat Repok, ditu, Hari Tiga.
Kaban Parlimen Sarikei nya madah, SUPP nyadi siti ari parti komponen pemungkal GPS deka terus mangku pengawa besai nentuka penegap politik nengeri seraya meri servis pemadu manah ngagai rayat.
Huang ti mega Kaban Kunsil Nengeri (ADUN) Repok madah, nengah iring Premier Sarawak enggau GPS, parti nya deka naka ulih ngemujur agenda pemansang ke pengelantang rayat sereta pemansang Sarawak. - Ukas
No comments:
Post a Comment