Jaku Pesan Gawai Dayak Ari Ketuai PKR Sarawak Baru Bian

Nyadika sebuah menua ti diwan mayuh pupu raban bansa, Malaysia nya sebuah menua dalam dunya tu ti nyambut sereta ngintu mayuh macham kemisi enggau pengerami. Kitai tau ngumbai utai tu siti penyelai ba kitai, lalu ngamatka penerang ti madahka rayat Sarawak ari mayuh pupu raban bansa ulih sama berami Gawai ninting taun, lalu ngembuan ketegal diri empu dikena beterima kasih.

Pengerami bansa asal ti diintu dikena ngelai penembu maya ngetau, tauka Gawai, nya sebengkah faktor dalam daya idup kitai ti nyelai tu.

YB Baru Bian

Ninting taun, maya tu taun rayat Sarawak enggau naka ulih mulaika diri ke rumah diri ari serata menua tu laban ti lelengau deka betemu enggau diri sebilik enggau diri semenua – tu mih maya sida ulih ngerapitka agi kaul sida enggau pangan diri, kelimpah ari nyuaka tanda terima kasih sida ke pengulih ketau sida semanjai taun ti udah.

Aku arapka daya idup enggau main asal kitai tu dijaga nyentukka jemah ila.

Taun tu Pasar Gawai Dayak bisi diatur kali ke terubah iya ulih Miri Unity Chapter sama enggau Majlis Perbandaran Miri enggau pasar besai Permy Mall.

Atur tu endang disambut enggau pengaga ati laban pengerami tu tau endur bala orang di nengeri ulih meda sereta ngasaika pemanah mayuh macham elemen ti bisi dalam pengerami Gawai nya empu.

Aku bisi diterangka pasal sekeda orang ti nguji deka nagang beberapa macham pemakai dijual, tang pengawa sida nya puntan udah bekau raban ti ngatur pengerami tu keran bendar deka ngayanka semua bansa pemakai bansa asal nya tau mudah ditemu ba pasar nya.

Tu mih siti chunto pemanah kaul ti bendar – ti endur kitai ulih ngayanka ngagai orang bukai nya kitai ulih nerima daya idup enggau adat ngagai pangan diri, bebasaka pangan diri lalu ukai nagang orang bukai seraya ngeluluka diri ulih bebatak asur penemu enggau bisi pengibuh.

Tu mih siti pekara ti mida kitai ari Semenanjung Malaysia. Penyelai iya di Sarawak ditu, orang dagang bepengarap Islam ulih nyual asi lemak iya sama berimbai enggau orang dagang bebansa China ti nyual dagin jani.

Tang pengawa tu enda ulih dikereja di Semenanjung Malaysia. Din, bida tu udah ditetapka dalam polisi perintah ti bejalaika atur bebelah bagi. Kitai patut ulih ngelala sereta nagang chara ‘Sememanjung Malaysia’ tu ari ti tama ngagai menua kitai tu.

Nyadika tanda endur perintah kitai nyau deka ngelala kitai ti ari raban bansa asal Sarawak tu, mayuh langgur dikena ngelai raban bansa asal ti ukai bepengarap Islam nya nyadika raban bansa Dayak baka ti dikena dalam pom rasmi kelimpah ari ngena leka jaku ‘lain-lain’, baka kitai ti dikelala ngelama tu.

Sekeda ubah patut digaga ba Konstitusyen Perintah Besai enggau mega Ba Konstitusyen Sarawak sebedau ubah tu tau nyadika pemutus lalu dipejalaika, tang tu udah nyadika tanda ti manah ti endur raban bansa asal Sarawak udah belabuh dikelala nyadika raban bansa ti lain di Malaysia enggau daya idup, tradisyen enggau pengawa besehari-sehari bansa kitai ti nyelai.

Tu deka nyadika pemun ke kitai Dayak ngulihka penuduk dalam komuniti, ekonomi enggau pengawa perintah di menua tu.

Ke taun 2015 tu, aku arap bendar ke ‘ketau besai’ kitai ba kaul manah, basa enggau daya penerima di Sarawak taja pan kitai kena pandang pengangat keruga enggau emba ekstremisma bansa enggau jalai pengarap ba endur bukai di menua kitai tu.

Tu mih nyadika kitai sebengkah bansa ti nyelai ti tau nyadika teladan enggau chuan ke orang bukai di menua Malaysia, ti tau bendar dikena kitai betemegah ati.

Kitai mega ngasaika penanggul ekonomi ti majak tendu enggau atur dikena bejalaika sistem chukai GST ba taun tu, aku arapka rayat Sarawak mengkang ngembuan pendiau ti bekelimat lebuh kitai melanja duit ringgit asil pengelelak kitai ti udah bekereja sepemanjai taun tu tadi.

Dalam kitai bekelimat enggau naka ulih, aku mega arapka Gawai kitai tu mengkang rami baka ti ngelama tu.

Ke bala kitai ti pulai betengahka jalai alun enggau batang sungai, aku besampika kitai sama likun lalu nyaga singkang pejalai diri empu awakka kitai ulih datai enggau likun ba endur ti dituju kitai, lalu udah nya ila pulai enggau likun mega.

“Selamat Hari Gawai Dayak, gayu-guru, gerai nyamai.” - May 29, 2015