SEBAUH, 10 Julai 2026: Agrofest Sebauh 2026 majak nyungkak agenda pemansang sektor agropemakai Sarawak ari ngena teknologi, bekunsi penemu enggau pengerembai makit, kelimpah ngerandang peluang ngagai Sebauh nyadi tibang nangchem di nengeri tu.
Menteri Industri Pemakai, Komoditi enggau Pemansang Kandang Menua Dr Stephen Rundi Utom madah, Agrofest nyadi pelasar strategik ngempung orang bumai enggau Opis Betanam Betupi sereta agensi bekaul ngulihka embing teknikal, servis sanding penemu enggau teknologi pemadu baru dikena nambahka produktiviti sereta penatai pemisi.
“Agrofest ukai semina bejual lalu ukai mega ngelaku produk aja. Tu mih awak mensia mayuh ngulihka malin ari Opis Betanam Betupi bekaul nama ke patut dikereja enggau baka ni ngemansangka tanah endur sida betanam betupi,” ku iya.
Iya nyebut jaku nya lebuh bejadika Agrofest Sebauh 2026 di Pekan Sebauh, kena Hari Lima.
Iya mega madah, pemansang sektor agropemakai begunaka kerejasama entara perintah enggau komuniti nentuka tanah ulih dikena manah, kelimpah nambah semekih asil lokal ari bekenaka teknologi enggau pengawa betanam betupi moden.
Seraya Direktor Betanam Betupi Dominic Chunggat madah ke Opis Betanam Betupi bejalaika tungkap ngemansangka Sebuah nyadi tibang nangchem berindik ari pemayuh peminta ba utai tanam nya ke majak nambah, nyengkaum ari makit Brunei Darussalam.
Ku iya, pekara nya ngerandang peluang ngagai mayuh agi orang bumai ngereja pengawa nanam berega lalu negapka rentayan bekal agropemakai nengeri.
“Kitai bejalaika tungkap ngangkatka Sebuah nyadi tibang nangchem. Peminta nangchem ari Sebauh mega chukup manah, nyengkaum ari Brunei Darussalam. Tu ngayanka berita manah ngagai kitai ngaul mayuh agi orang bumai ba industri tu,” ku iya.
Iya mega meransang orang dagang ngulihka setipikit Malaysian Good Agricultural Practices (MyGAP) nentuka asil betanam betupi tetangkupka standard pemakai likun, kelimpah nambah pengandal penguna enggau produk ulih besemekih ba makit.
Berebak enggau nya, orang bumai diperansang meri perati ngagai utai tanam ke bisi mayuh peminta ngambi ulih meri asil ke meruan agi sereta nyukung agenda jamin bekal pemakai Sarawak.
Sama datai, Sapit Menteri Industri Pemakai, Komoditi enggau Pemansang Kandang Menua Martin Ben, Sekretari Mendam Opis Menteri Industri Pemakai, Komoditi enggau Pemansang Kandang Menua Sarawak (M-FICORD) Sirai Daha, Residen Sitak Bintulu Datu Nyurak Keti, Pegawai Pelilih Sebauh Thaddeus Ling Bartholomew Allu enggau Pegawai Betanam Betupi Sitak Bintulu Jackson Nanta Barnabas Baie. -EDISI UKAS
