Cobbold: Penemu KM Sarawak enda betul, nyempelah

SIBU, September 3, 2017 - Presiden Parti Bansa Dayak Sarawak Baru (PBDB) Cobbold John dalam surat penerang iya madah Kepala Menteri Datuk Amar Abang Johari Tun Abang Haji Openg ngembuan penemu ti nyempelah.

Presiden PBDSB Cobbold John

Cobbold mansut ka penerang tu nimbal sebengkah penerang ti dipansut ka kepala menteri ti mejah sekeda piak ari ti bemain enggau isu pekara pengarap ba isu direktur opis Petroleum Sarawak Berhad (Petros).

Abang Johari ke mega Presiden Parti Pesaka Bumiputera Bersatu (PBB) mansut ka penemu tu lebuh ti ditanya pengarang berita maya ti bejadi majlis korban nerdana eringkat nengeri ke diatur ba Masjid Darul Hana, di Kuching kilah ensanus.

"Penemu Abang Johari tu hot air. Nadai piak Parti Dayak  kala nyebut isu ti bekaul enggau pekara pengarap ba isu ti bekaul enggau direktur upis Petros ti dipadu ka perintah nengeri Sarawak"_ Cobbold madah.

"Urang ti mansutka penemu ti bekaul enggau isu pengarap tu iya nya Menteri Muda Pekara Koperat, Abdullah Saidol ke alai iya bisi nyebut Bumiputera ukai Islam deka dipaduka mangku pengawa direktur ba upis Petros,"_ku Cobbold.

Cobbold mega madah, penerang Abdullah Saidol tu mejah penemu Datuk Amar Douglas Uggah Embas, ke alai Abdullah Saidol nekang penemu Uggah ti madah ka diri diasuh Kepala Menteri, ngiga seiku Bumiputera Ukai Islam nyadi Direktur ba Upis nya.

"Penemu sida PBB tu betelisih enggau pangan diri. Kelimpah, penemu nembiak PBB (Abdullah Saidol), ngemaruh ka Uggah ke mega Sapit Kepala Menteri I,"_tandu Cobbold.

"Nya alai, sapa ti bekuasa meri jaku pemutus dalam PBB? Lalu bisi PBB betanya agai cabinet sereta kompenan parti Barisan Nasional menua Sarawak?_ Cobbold nyemetak madah.

Pekara tu ku Cobbold nadai bekaul enggau pekara pengarap. Kelimpah, menua Sarawak sigi enda ngembuan penemu ti bepilih bansa baka sida Malaya. Tang ku iya, pekara isu direktur Petros tu mandangka perintah Barisan Nasional Nengeri Sarawak tu lemi, sereta semua pemutus ba jari PBB magang.

Peranak pupu bansa menua Sarawak diatu patut muka mata ba pekara ti udah nyadi. Isu polisi bechiping ukai semina nyadi ba tikas Upis Petros aja, tang mega mayuh pangku pengawa ke patut dibagi sama rata nitih ka komposisi pupu raban bansa ti nguan menua Sarawak,"_ tandu Cobbold.

Ba pengujung penerang iya, Cobbold minta Kepala Menteri Datuk Amar Abang Johari, meri pemutus jampat ba isu ti bekaul enggau isu Tanah Adat Asal Bumiputera (NCR) sereta anang manggai ka semua isu ti bekaul enggau bansa Dayak ba bau Uggah siku aja.