SIBU:, July 22 2026: Gobenor Tun Wan Junaidi Tuanku Jaafar enggau bini iya Toh Puan Fauziah Mohd Sanusi enggau program Unity Walk serimbai nyambut Hari Sarawak 2026 ke ngempuru lebih 10,000 penyereta di Dataran Tun Tuanku Bujang.
Mensia mayuh tumu nedat endur nya pukul 6 pagi ngambi bagi ba program ke nyadi entara batang program nyambut Hari Sarawak taun tu.
Tun Wan Junaidi enggau Toh Puan datai urung pukul 7 pagi sebedau bejadika program nya.
Nyempulang iya Menteri Dagang Temuai, Industri Kreatif enggau Seni Pemerindang ke mega Menteri Nembiak, Lumba enggau Pemansang Orang Dagang Abdul Karim Rahman Hamzah, sereta Menteri Pengangkut Sarawak ke nyadi Menteri Ngempu Tanggungpengawa Nyambut Hari Sarawak 2026 Lee Kim Shin.
Sama datai, Menteri Pemansang Indu, Nembiak Mit enggau Pengelantang Komuniti Fatimah Abdullah, Sekretari Perintah Sarawak Mohamad Abu Bakar Marzuki, Sapit Menteri Pengerai Mensia Mayuh, Pengawa Berumah enggau Perintah Lokal Michael Tiang Ming Tee, Sapit Menteri Pelajar, Inovasyen enggau Pemansang Pengelandik Dr Annuar Rapaee enggau Sapit Menteri Perambu Mengeri, Pengatur Tanah enggau Rampa Menua Len Talif Salleh.
Tembu bejadi program, Tun Wan Junaidi enggau Toh Puan bejalai bebala mayuh enggau beribut penyereta ke nganyanka semangat penyerakup serimbai nyambut Hari Sarawak.
Iya udah nya limpang meda Pemandang Sejarah Hari Sarawak 2026 sebedau ngulu program ngirup pagi di Sibu Kitchen.
Ba pengawa ke sama, Tun Wan Junaidi enggau Toh Puan dirami enggau pemakai begulai enggau bala pemesai sebedau nerima tepa sampin enggau selayah tauka keringkam ke disua Bala Tuai Raban Bansa Sitak Sibu betuai ke Temenggong Wan Hamid Edruce.
Muak ke malam, Tunr Wan Junaidi ditaga ngulu Gempuru Hari Sarawak 2026 enggau Konsert Rayat ba endur ke sama ke alai Premier Abang Johari Openg disadang sama datai.
No comments:
Post a Comment