SARATOK, 27 Ogos 2026: : Bisi 429 iku sida ke beempu tanah Hak Adat Bumiputera (NCR) di Krian nerima Surat Pala Tanah nengah Seksyen 18 Kanun Tanah Sarawak ke mungkur 520 lot individu enggau 679.6 hektar tauka 1,679.34 ekar pemesai.
Tu nyengkaum tanah di Sungai Krian enggau Sungai Kabo diberi 289 surat pala tanah ngagai 264 penerima ke mungkur 330.48 hektar pemesai.
Nangkan nya, ba Entebu-Selambong diberi 179 surat pala tanah ngagai 121 penerima enggau 311.79 hektar pemesai lalu di Kampung Sepuk, Krian diberi 52 surat pala tanah ngagai 44 penerima enggau 37.34 hektar pemesai.
Sapit Menteri Pengatur Menteri, Tanah enggau Rampa Menua Len Talif Salleh madah, Perintah Sarawak semampai chakah mutar isu tanah NCR.
Ku iya, tanah ke digazet nengah Seksyen 6 Kanun Tanah Sarawak ukai dikena ngambi tanah rayat tang nyadi chara dikena nentu, ngerikod sereta nyaga tanah NCR sebedau diberi pala tanah nengah Seksyen 18.
Iya nerangka pekara nya maya nyuaka Surat Pala Tanah Seksyen 18 ditu, Hari Empat.
Kelimpah ari nya, iya minta sida ke beempu tanah meri kerejasama ngagai Opis Tanah enggau Survei (JTS) nyengkaum besetujuka tanah sida disukat, ngerintis entara sereta datai enggau orang beempu tanah sepiak maya pengawa nyukat diatur.
Bela datai ba pengawa nya, Kaban Kunsil Nengeri (ADUN) Kalaka Mohamad Duri, ADUN Krian Friday Belik, Sapit Residen Sitak Betong Mohammad Nizam Wang enggau Pegawai Opis Pelilih Saratok Muhammad Dino Amid.- EDISI UKAS
No comments:
Post a Comment