MARUDI: 25 Julai 2026: Pengawa meranak puku sepenyampau RM3.8 bilion ungkup Projek Jalai Miri-Marudi-Mulu-Long Lama (MMMLL) disadang nyadi penyungkak transfomasyen Baram nyadi palan pemansang ekonomi baru nengah nambah rentayan enggau pemansang infrastruktur.
Caption: Premier Abang Johari Openg madahka penemu enggau inovasyen nya kebuah besai nambah rega ekonomi tu nipak pemansang enggau pengawa meranak puku ti dibai perintah.
Premier Abang Johari Openg madah pengawa ngaga rentayan jalai nya deka nyendia peluang baru ngagai Baram seraya nyendia peluang pemansang ti besai agi ngagai peranak menua.
“Jalai tu deka ngerandang palan ekonomi Baram ke alai keterubah, nengah sektor servis iya nya budaya kitai enggau penyelai dikemisi ditu.
“Kedua, pengawa betanam betupi moden ti ulih nempa komoditi eksport laban Baram ngembuan tanah bebukit.
“Udah tentu, pakar sains ulih berati ke tanah ditu lalu begulai nyaup pekebun sereta komuniti ditu ngasilka komoditi betanam betupi ti ulih dieksport,” ku iya lebuh Pengerami Bejadi Baram Regatta 2026 di Tebing Sungai Marudi seritu.
Abang Johari mega madah, pemerani perintah nengeri meranak puku ba projek nya digaga pengudah ngira untung timpuh panjai ngagai pemansang ekonomi enggau pengelantang rayat.
Ku iya, penemu enggau inovasyen nya kebuah besai nambah rega ekonomi tu nipak pemansang enggau pengawa meranak puku ti dibai perintah.
Berebak enggau nya, iya ngelalau rebak biak Baram ngerebut peluang nyikap diri ngena penemu sereta pengelandik pemadu baru ngambi ulih ngena pemansang ti benung ranchak dipejalai dia.
Ku iya, ekonomi diatu mansang nipak peneras penemu ti maju nitih ke arus pemansang moden ke bisi diatu ba renggat global. - Berita Ukas
No comments:
Post a Comment